Mapalad ko’ng tutu ngeni, ikayu ngang kayanakan
nung kekata’ng ikumpara, ing megi ming kaintangan
kanita ring keke’ng pyalung , makasikan lang katawan
makagising uyat ampon, makatais kaisipan
anti mo ring maromaro, luksung baka, arindingan
sipa, siatu, piku, tetsing, pasi ampon salikutan

Ding trak-trakan mi kanitang, king dalan piguyudguyud
basyu lang latang sardinas, a kekaming apupulut
ding gagawan ming parugang suelas do ring mengapupud
a sinelas a bitas na at e mi na asusulud
tabasan mi la mung kampit, ketang alkus a mabilug
at itungi mi lang kuayan, king sentru mingatbang danggut

Misan naman, munta kami, king manabtak a taldawâ
aswalan mi karing, palang itang masias a buligâ
itang atipun ming gabun, bababad mi karing batya
ban potang sinipsip danum, medyu maging burak bagyâ
at kaibat umpisan mi na ing kekaming pamangawâ
karing mialiwang aske ring robot ming paningayâ

Kaibat ning mapilang oras, ning kekaming pamamyalung
munta ke pa ketang pulu, ban ke mung makapaniutung
neng kanita e la usu ring awsan dang “ESSO GASUL”
inia ing kekeng panangab, menasa kusut mu’t dutung
ing mabayat mi pang obra, sasaklu ke rugung danum
uling ala pa kanitang “Water District” king San Simun

King salukuyang panaun, ding anak e no sasaklu
e na la mu rin maniutung, a anti king delanan ku
uling dakal na “gas stoves”, at pelalung ding giripu
karetang kilub dang bale , no ngan deti makasusu
di batirya la pialungan, “remote control” a mudernu
ding aliwa atin la pang, “TABLET”” at “CELLPHONE” a bayu

Ngeni deting kayanakan, e na la mipapawas man
neng menasa “computer” na ing karelang pamialungan
inia nung e la maputla, neng e la mialdawanan
ditakditak lalabug la ring karelang panimanman
magkang datang ing panaun ding kekatang kayanakan
nung e la man lunto kalpa, mekad alus lula la ngan..

Vhelle V. Garcia
December 6, 2018
Abu Dhabi

Ing lingguaing lKapampangan, salita reng katutubû
Ding kanakung pipumpunan, a apu ring kakung apû
Iti apin ing amanu, a pekamalan dang tutû
Ring pengari kung malugud, a kaku ra naman tirû

At uli ning amana ke, ibat king indung balayan
Masampat mung lingapan at, kanaku yang pakamalan
E anti karing aliwang, gewa reng kapanintunan
Itang dapat a libri mung, pamanurung Kapampangan

Detang taung makinabang, neng panakitan de iti
E la tutung magmasabal, king kekatang manang sabi
Ing karelang adbokasya, e ya para king lingguai
Nun e para king kapurian, na king karelang sarili

Ing amanung Kapampangan e ya para karing isik
Alemanya, inglatera, Amerkanu ampo Pransis
Para karen yang kabalen, inia dapat yang magamit
Karing anggang kawatasan, a sinulat da king inglis

Bala ra mo ring aliwa, mitatas la pangatau
Neng manialita lang inglis, a susulat da king libru
Ing salita ra ring daywan, metung yang klasing amanu
E sukdanan ning kabiasnan, ban mayaus tang larinu

E naman bawal maninglis, o manialitang tagalug
Dapot dipendi mu naman, king kekatamung karungut
Lakwas nung darayu tamu, karing lugal a malaut
A saklo ning Pilipinas, dapat tamung managalug

Nung tagalugan ta no man, ding kekatang katubale
O kaya ding kapampangan, a maralas tang kayabe
Ala tamung kealiwan, karetang awsan dang luse
Alang malit king matulid at dapat a masalese

Inia nung Kapampangan ka, sukat kang mangapampangan
At gamitan ing amanu karing kekang kawatasan
Nung inglis ing makasulat, king libru mu at pamasan
Ika ing manialampitak, king kekata’ng sabing menan

Vhelle Garcia
July 16, 2022
UAE