Ketang inawus dang lugal baranggay na ning salusad Ating mamagprapupasa metung ya karing kagawad Kayi kabud ne kikimut king lugal da ne kasipag Gugusal dili dili na maranun pamu ning abak.
Ining mesabing kagawad pelagyu dang matuang tonyuk Nanu man pisasabyan ra abe tambing makatumpuk Balamu ya ing kapitan king pamanasta nang pamuntuk Potang atin nang problema buri na ya namung kikimut.
Misan pintalan ing Mayor da king daplis nang depatan E ra balu king konseju maging ing keyang Kapitan Ing panyad nalang ayuda dakal e kanu mamangan Ing kimut nang matuang Tonyuk bala ing magparangalan.
Pane na namung bibida yang kagawad a mumuna Milako na ing matribus pati kareng kayabe na Arapan yang sasalangsang, magmabiyasa biyasa. Uli king sablang balu na ding memaryu yang kampiyan da.
Daraptan nang matuang Tonyuk magulu ing kapulungan Milako nala respetu pati na keyang Kapitan Ining karelang konsejo e dana naman gagalang Mipamulitiku na la malawut pa ing alalan.
Ing panyulung na ning baryu memaryu makasalale Nung ilang misasanmetung ing lugal apatatag de King dapat nang matuang Tonyuk migkanya kanya lang pake Anya pin ing milyari na ila nang mipate pate.
Gang palang keng aguman, nanu pa man katatagan Kikimut ding balang metung akakwa mipanyalangsang Tatabak lang makagulut kanya kanyang lang paralan Nanu man katibe ing grupu migupu ya kelwatan
Ing ugaling anti kanyan kasaman ning Apung Ginu Panugali nang Lucifer a bisang sansam king tronu Inya karetang angeles a linto magninu-ninu Menabu la ketang dagat a mamapi, ing infiernu.
King makanyan a prinsipyu antimurin ding manwala Aisip da sang manene ayalak da’t abitasa Nung alang pami metung kening mayap a pigampa Masayang mu at malaso ing. mikalub tang damla.
Makuyad a Poesya Irvin Harvey E. Rivera Siuala Ning Maliwalu/Anac Ning Baculud July 7, 2019
King pilan kung Banwang mekikaluguran Karing miyayaliwang tau king Lipunan Dakal ku abalu king dimut kung belwan Maragul dang dake e ku palingaran.
Megui kung matibe at subuk nang tau A megui nang padrun king pamaglakbe ku Inya nanu man ing ‘pakit kung animu Piju ku at pijung akit at akit mu.
Miyayaliwang aske, miyayaliwang lupa Atin balat-kayu, ampong “Dobli kara” Atin maganaka, atin palamara Atin e bubulad, atin e malmura.
Miyayaliwang ugali, manawang, masampat Ing ka’kung akakit karing balang daklat Dapot nung ing nasa king mayap a dapat Karin ku mamulut, karin ku kumawat.
Ninu mo kaya ing tatalan king tabak At kagulutan ku, manatsit, manakdak? King dane labwad ning mapayit, masalpak Pamikaluguran, misan mung misaldak?
Ding Piping amanu kanyan no matunggue Kanyan maputut ing pamiyabeyabe Ding mayap a nasa kanyan no mibakle King pamagpabusta, kanyan no miyugse.
