Capampangan

Ken mung atlung pulu, a pirasung pilac
Guinung Jesucristo, pisali neng Judas
dapot ketang cayang, catacsilang depat
pigsisia’nang lubus, at piniawad tawad

Marahil pauli ning sobra nang dine
caring apostoles niting acayabe
mas birian na pa ing, careti miwale
capamilata’ning, pamagpacamate

Mecad aisip na, ala na ring sangcan
a mie ya pa uling sira ne dangalan
at ing tiwala ring cayang cayabiayan
e na na abalic, baski pa capilan

Nanan na pin naman, ing cumabie ya pa
nung e no matula ring abe na caya
lunto namung ala yang delicadesa
nung pamilit ne pa itang sarili na

Samantalang detang, tacsil king balayan
a nanapnap ketang, lama’na ning caban
o ren pang mabibie, cambe ring mapilan
caring galame ra a alang picabsian

Mayap ne man palang e palac i Judas
king catacsila’na, daca’lang miligtas
o ring puliticu a memanarampas
uli ra daca’lang dungus ring mangaplas

Oba’t ayamyam ning carelang cunsensiya
panganyaya ro ring migtiwalang masa
king macacasnuc a cararaptanan da
I Judas careti e tumud balandra

Ding memalen ila ring magsacripisyu
a waring mamusang curus king calbaryu
cabang ding hudas king kecatang gubyernu
magpacasasa la king carelang pwestu

Angga ta na ketang, talapusan curus
a malambat-lambat ta na ring guguyud
tinggap ta’ng parusa ume yang mapupus
potang mate ta na king milalung danup

Deti sanang hudas caring manungculan
pati ring butantis, a mulalang misdan
aisip da sanang mamagbigti no ngan
ba ta nang micabus kening casakitan

Vhelle V. Garcia
March 27, 2016
Abu Dhabi

Catacup ning silim, ining Bertung kirat
bala – balikid neng king dalan lalacad
nung king palage na alang macayalac
caretang tanaman agad nang miucyat
carin mibata yang manenayang oras
ban macapanyilip caretang mibablas

Pablasang kirat ya ing metung ng mata’
inia macanian yang e na miglolo pa’
tatacut yang magcang king cayang itsura’
umisan de mu ring nasang paglolon na’
inia king idad ng migit nang kwarenta’
i Bertu megi yang baintaung matua

At uli na pin ning alang caranasan
king mayumung lasa na ning capalsintan
mistula ya waring asung mamumulang
neng macaramdam yang pali ning catawan
inia’ing pamanyilip cayang augalian
a waring caniti babye capaldanan

Caretang tanaman, bandal neng papanic
ustung malulam na’t medyu linticlintic
tatacut ne’t e na buri pang maulit
ing penandaman nang e bibirung sakit
iniang tagusgus ya’t mayacdac a buldit
king putut a cuayang, king pun macasandig

Inia ketang misang, manuldul masican
cabang ati yu king babo ning tanaman
tambing yang kinuldas, at caras na lalam
caring gumamila, ume yang migpampan
at king lalam bale ra ri tatang Damian
cari’na penayang mibulus ing uran

Sactu naman itang atupan nang bale
marakal ya aslat at siwang king lande
inia sinawa ya matang maglalawe
karing makapaldang lalabas ng pane
ban lalung mibastag ketang pamanalbe
Pigkeran ne niti ing ikit ng dase

Dapot itang dase a keyang kesatan
mapanas ya pala, e na apansingan
gulpi yang tinikdo king ba’nong pagpagan
inia mipucpuc ya karetang pipakuan
at king tulid na ning keyang kepucpucan
carin ya magkera ining tatang Damian

Ing patac ning uran pablasang masiglâ
ding tau king babo e ra aulatâ
at maging ing matwang carin macakerâ
e na rin ayalac neng maclac neng bagyâ
dapot I tang Damian gulping migsalitâ
maco ca ken nganang ginulisac biglâ

Usung e ca meco, keca ke ibarug
ini nang aldabang, king awang panucud
inia ining Bertu agad neng kinimut
carug carug salung linakad pagulut
oneng kabud-abud ating gulping merug
pilatan ning cayang tundun ampon buntuc

Mipa-pulai yang cacapac a baba^
e nacu pu mulit ngana pang gagaga^
ing e na balu n’yan ing sese ng pusa^
Ing pakisabyan na ning matwang mimimwa^
alang merug keya adalpak n’yang bigla^
itang kalat kalat a lumang piruya^…

Vhelle V. Garcia
April 24, 2014
Abu Dhabi, U.A.E.

Ing miniamsam barya, king “hardware” ning intsic
ban saling panulu, para king masakit
maybug neng magisan, lua king catatangis
a maniawad tawad , e ya meulingid
at calabas na ning, mapilan penandit
dinatang la retang, inaus dang pulis
ding dinacap caya, tambing deng inabit
iniang caposas na, pildac de pa buldit

Detang adwang pulis, bayu la ginulut
ing intsic carela, atin yang inabut
marine la pamong, gamus-gamus buntuc
at pasimpli ro pang, king bulsa ra sicsuc
uling mirinan la, reting pasalicut
pepalto lang gilas, ketang pepadamput
king arap na niti, carin de pindungus
taung manigapu a magmacalunus

At iniang miras la, carin king prisintu’
ing taung decap da ngidgud de simentu’
mebalangingi ya’t, mengaraya sicu’
at maybug aybug nang, milaco animu
bayu ya pa milub, keta king presidiu
e ne milacad man, mistula yang lumpu
bistaman ala pang, pormal a reclamu
a caya simpa ra , king ban mica-casu

Samantalang detang, menampas bilyun
karing puliticung kanita mesucul
e ro man atagkil king danggut dang arung
atin la pang bante, a babie protecsiun
at ding suculan da nung nu ra la kilung
mistula lang cuartu king marangyang mansiun
ot e ro iyabe caretang simarun
cabang panayan dang mibaba ing atul

Apin yan ing clasi na ning democrasya’ ?
a pekipamuc ding bayani canita’ ?
Ing gubyernu tamu nucari’ne dela’ ?
binye ne king palad da ring mangacualta’
pigcalub re iti calibe ning pera’
ban ila na reting canyan magtamasa’
ding pacacalulu, e ra ne akit pa’ !
angga king magpiyac no ring carelang mata’….

Vhelle V. Garcia
October 11, 2014
United Arab Emirates

Malagad lang tutu, ring tapat makiabe
o retang awsan dang, calugurang tune
uling ding mapilan, ala lang marine
at balu ra ca mu, neng atin cang babye

Daca’la ring clasi, ra ring caluguran
atin mayap ampo, pang ugaling basan
ating hudas a e, mu apagtiwalan
ipisali na ca, nung e makinabang

Atin mababa lub, a kagad magtampu
macapal a lupa, at alang istilu
atin mu rin naman, caring abusadu
mapamiru ampon, taimic mung tau

Mangatas a lub a, e tatanggap malî
a maging dala’na, ning pamicawanî
atin mu ring picun, a tambing papalî
caras caring birung, tutung e ra burî

At atin mu namang, pane mung cacabid
nung kailangan daca, carin mu la akit
at caras king puntung, ica namang lipit
agyang atin la ren, e ca man milapit

Ating calugurang, minangat mung bagyâ
melasun na utac, king bie rang marangyâ
e no manatu man. lubus migpabayâ
king pamiyabe yung, panaung macabâ

Dapot ing macaniang, ugali ning tau
apin ing gawi ra, e ‘ta na abayu
uling ala namang, mibait perpectu
ninu man careting, mabibie king yatu

Tune caluguran, e ra ca ibalag
cayabe mu la king, tula’at pagsalbat
balu rang balicdan, ing depat mung mayap
e ra ca lacwan den, agiang nu co miras

Ila retang taung ating malasakit
a ketang carokan e ra ca ibulid
ipaganaca ra ing ustu’t matulid
nung malilili la ding kecatang isip

At ila mu naman ding tutung darame
king manawa’t maskup ning kecatamung bie
e la mangalingwan atyu la mung pane
miras man carela ing anggang tagumpe

Tune caluguran, macanian la dapat
e la paisilo king, kinang ning perlas
king carelang pusu, manatiling tapat
ing pami-abe yung, e dapat cumupas

E na pa baling ing, cacaluguran mu
miki-calocuan ya, at medyu magulu
kesa caring ating panugaling diablu
a mitulac keca carin king impyernu

Maulaga, ica makyabe cang tapat
caring calugurang, cayabe nang maluat
lacuas na caretang, manibat king ibat
cayabe mu na la at cataling pusad

Nung “ICA” atin cang, tune “CALUGURAN”
ipagmaragul me, ampon pacamalan
ila pin ding gintu, a e man kikinang
matas la kilatis, migit king nanu man…

Vhelle V. Garcia
April 20, 2012