DINAT KING ASKE

Posted on April 29, 2022 by Irvin Harvey Rivera

Makuyad A Poesya
Irvin Harvey E. Rivera
Siuala Ning Maliwalu/Anak Ning Baculud
May 16, 2019

Misan a kabengyan kabud ku mipakde
King pamanudtud ku king masyas a lande
Inyang mimasmas ku, ayisip ku ing bie,
Ing bayat na niting pisanan king takde.

Kanyan ku aisip ing bie na ning tau
E me atasa nung nanung pamagbayu
Maging ing sikanan mirinan yang sepu
Alang kapilisyan tumwa at tumwa ku.

Magi ing mapinu’t malare kung balat
Kumupas mu nama’t gumaspang king salat
Magi ring uyat ku karing ka’kung gamat
Kumaimpis king ketwan saka no mapanat.

Kanyan ku na akit anti mong lelangan
Pamagmalapilak na ning bwak king ketwan
Nung ining alkus ku’t binang katikmusan,
Kayabeng kumupas, ikera ning keynan.

Kanita ku na ya, kutang king sarilia
Nung ing pamagbayu kapilan malyari?
Ding sadya kung abe king karinang iti
Lakwan da kung misan a magdilidili?

Nanan mu ing legwan nung keta king aun
Misimpang malalam, mikutkut king gabun?
Na’n mu yang tikmusan, e wari malaun
Tumwa ka’t manuban, kalingwan ning napun?

Ing pangamate ku, makalimbatawan
Ding mayap a dapat i la nang malakwan
Marimla kung aun e ra ne puntalan
Bukud panalala, yang ka’kung depatan.

O, inya sa’ kabang ding adwa kung bitis
Malale ku la pang apipildispildis
Kabang ing keynan ku e pa labislabis
Dinat ku king lupa ume sa’ng mapulis.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

ALINO KING SALAMIN

Posted on April 29, 2022 by Irvin Harvey Rivera

Irvin Harvey Rivera
Siuala Ning Maliwalu/Anac Ning Maliwalu
Published and Copyrighted May 7, 2018©

Misan ating metung matsura panasbuk
King pangapika ku kabud ku n’ya timbuk
Uling mesora ku king katas na puluk
O’t mikapali ku, perayan ke pambuk.

O’t e ku mapika, asne kapangaya
Bala na siguru dakal a matula
E na yata balu—-lulwal a salita
Inya, ikwa nakung abakle’t apamwa.

Tumbuk nakung tumbuk, ‘saka ku malmura
King sobrang kamwa ku penatsit ke mata
E na bala ngaku, ‘gyang dalum na kupa
Apakalbag ke sa’ matsura nang lupa.

Kaybat keng penumbuk, malagwa keng bitbat
Akmang sakalan ke king lubid batibat
Nung apate ke man, ngaku pang mekibat;
Binang maulaga king gabun ya kasat.

Kanyan ku balakan ing sakalan ku ne
E ku patugut nung e ke akit mate
Kabang mibabwa ku at panyakalan ke
O’t e ke maybug man a apate-pate?

Kanyan ku minurung, ka’ku keng apansin
Ing makapakat a malinong salamin
Megumasdan ku at mipayarap karin
Kasalang kung multu—- yang sarili ku rin.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

MASAMPAT A PARASAN

Posted on April 29, 2022 by Irvin Harvey Rivera

Makuyad A Poesya
Irvin Harvey E. Rivera
Siuala Ning Maliwalu/Anac Ning Baculud
March 1, 2019

King sinta kung Balen ninu ring sumuyu
Ni’ng mangipuk kaya king kalma nang bigu?
Ninu ing gumusal talindo na’t lagu
A e mu misimpan, mangaring kulapu?

Ing tune serbisyu anting sintang wagas
King mutyang dalagang pakamalang perlas
Dapot nung ing nasa magbabo pang lakwas
At mipalsinta lang a e apikabas.

Nung sumuyu la sa ing pakisabi ku mu
Luguran deng mayap keka tamung Amanu
Yabe re sana king karelang proyektu
Kalupa ning dakeng babye keng Gubyernu.

Nung ninu man detang ating pita’t nasa
A bisang sumaup mangipuk king kalma
Ning mamamate nang Amanung maluka
Ilang suportan mi’t kekaming pamingwa.

Inya, sana kareng bisang manungkulan
Pakiyabe ye pu ing Amanung Siswan
Masampat a gusal king Amanung Menan
Yang dinan yung oras, magui yung parasan.

At nung sakali man meguing matagumpe
Ing mesabing gusal mirinan yang dake
E ne kapilanman miwaglit, milele
Matatdang Amanu milwid ya’t tumibe.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

Y PEDRUNG TATAGAL KAPITAN

Posted on April 29, 2022 by Irvin Harvey Rivera

Poesiang Mica-Capusungan
Irvin Harvey Rivera
Siuala Ning Maliwalu/Anac Ning Baculud
April 26, 2018

Atin kung akalap balita king Baryu
Tatagal ya kanung Kapitan i Pedru
Agpang king balita a miras kanaku
Llamadu yang palak a manikwang botu.

Nung king sipagan mu e ne man malakwan
Dakal ne agawa king baryu nang tibwan
Metung na kareti, kareng kayanakan
Apanaligan de king bague makanyan.

Meging number one ya ‘nyang tagal Konsyal
Atin yang pagasang sumambut, miyalal
Subukan na kanung Kapitan ya tagal
Panyulung ning Baryu e ne matigagal.

Nung lumput ya kanu at i yang mipala
A maguing Kapitan ning Baryu Pagaga
Kalupa ning kayang masampat a nasa
Buri nong sopan ding Kabaryung maluka.

Muna nang proyektu, pagawa yang dalan
Bang itang panyulung ning Baryu amatan
Binang masaleseng buri na pang daptan
Pasamientu no ngan kanu ring dayatan.

Kadwa nang proyektu, bina yang matilo
Agyang king isip mu alang bisang tikdo
E ne man mo kanu a binang masaklo
Ing buri na sana takpan ne ing aldo.

Katlu nang proyektu, pagawa yang bale
Atin yang ospital at piyalbeng sine
Nung buri yu kanu ing masampat a bie
King mental ospital, Kapitan botu ye!

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

PAMUN, QUERUBIN FERNANDEZ, JR, P.L.

Posted on April 28, 2022 by Almario C. de Jesus


(Panalala keng aldu nang kematayan, Querubin Fernandez, P.L.)
(Capampangan Version by Almario C. de Jesus)

Bista ma’t meco ne, ing mapiang poeta,
Cambe na ning lungcut, at lua da ring mata,
Kilub na ning pusu, tutu keng Manuala,
Mayap nang carinan ning Dios ca Mipala.

**
Bye mu keting Yatu, dacal ca lingapan,
E migcucunwari, sinaup cang miuman,
Masampat a usuc, mitmung catapatan,
Ing kecang depatan, careng mangailangan.

***
Belangcas mung Obra, cawatasang tune,
Dangal ning Parnasu, careng maglalawe,
Tune mayayakit, diwang misnang tibe,
Pake ra’t tagimpan, ning Dajing e Mate.

****
Keca Na regalu, itang gintung pluma,
Keng kecang panlaco, keca neng idala.
Deng bayung sisibul, a keca magmana,
Careng turu’t usuc, nabangnan da sana.

*****
Kecang Caluguran, maldang talatuki,
Lugud at pag-galang, bucud mung asabi,
Tutu pin Meco ca, at licuan mu cami,
Dapot ati ca rin , king Pusu’t isip mi.

acdj

Posted in PL Almario C. de Jesus, Poeta Laureadu | Leave a comment

I JESUS INARAP DE ITI CANG ANNAS AMPO CANG CAIFAS – JUAN 18: 12-40

Posted on April 25, 2022 by Orly M Dizon

binersu neng ORLY MANALO DIZON; Sucad: 8/8

1
Ding macasulat dapat lang / matupad mu ketang oras
Ginapus De(JESUS) ding sundalus / at agad dela cang Annas,
Ining Annas agad naman / penibala ne cang Caifas
Metung pari da ding judyo / a carelang pecamatas,
Pengutnan ne’i JesusCristu / king ban atulan yang patas
Dapot ala yang ikit man / lebagan Nang nanung batas.

2
Caretang Keang(Jesus) alagad / adua la retang tinukî
Ing metung ‘tin yang kilala / carening matas a parî,
At ing metung ya i Pedro / magmatiag yang atubilî
Inia ining bante pasbul / akilala ne’t sinurî,
A i Pedro metung caring / disipulus Na’ting sugî
A malagua iting lingad / “ali acu” nganang matnî.

3
Caibat linual ya i Pedro / ketang api ya migsalab
Kitnan ne ning casipin na / ing metung ya pin alagad,
At mabilis nang pekibat / “ali cu” nganang maglingad
Ampong atin pang menakit / king hardin ya ing menabtab(balugbug),
A payalian “ali acu” / ya ing pekibat na’t bungad
Canita na itang tandang / tinulauc iting agad.

4
Meging disisyun nang Caifas / ing cang Pilato ne dalan
At Pilato antimurin / cang Jesus alang asangcan,
Sinuri neng miamas-amas / nung ‘tin yang utus lebagan
Itang keang pamanyuri / ala ya’ting casalanan,
Mipaintagun ya ing aldo / nitang Pascung keugalian
I Pilato mamulus yang / metung a presung tulisan.

5
Canita na detang judyos / cang Pilato da inauad
At masugid iting aduan / melisuas la at gagagad,
A i Jesus yang atulan / camatayan agad-agad
Iya itang ilibe da / caring aduang presung sucab,
Ya’ng ipagmaralampu da / disidung ipatupad
I Jesus yang miparusan / ding judyos bucad dang angad.

DIZLAG FARM, April 13/22.

Posted in PL Orly M Dizon, Poeta Laureadu | Leave a comment

ING MENACO MANUC

Posted on April 25, 2022 by vhelle garcia

Iniang cagli ya ing, asawa nang Simu
memita yang manuc, deta pang manutu
neng alang panyali, ing gewa na rugu
menaco yang lasac, cule yang malutu

Agad yang minuli, at caras na bale
mipali yang danum, cayari neng pete
dapot cabang iti, bubulbula’na ne
decap de ring pulis, uling ayactu re

Ita palang manuc, a cayang penaco
bandi ne ning meyor, imported yang tatyo
rigalu re caya, pilan pamung aldo
ning calugura’nang, ibat king Mexico

Inia ing menaco, pekiduang neng agad
ba yang miparusan, king sala nang depat
penandit dintang la, ring cayang alagad
inarap de ining, Simung pacaposas

Pablasang ing meyor, mamacla-macla ya
inia ring masanting, ila ring capad na
at uling I Simu, tictac ya catsura
mecad lumasa ya, balat king parusa

Inaus neng meyor, ing cayang alale
saca ne pepacua, ing manuc a mete
“malagua ca ngana, iti iderang me”,
“caibat magbali’ca, ustung melutu ne”

Calutu ning manuc, epag de lamesa
at caibat cang Simu, ating migisplica
“nung nanung gawan mu, kening manuc” ngana
macanian mu naman ing daptan mi keca

“Alimbawa, ngana, picli me mo pacpac,
paclian mi la naman, ding adua mung gamat”,
“at ustung ding bitis, ding kecang piglapac,
anti’ta mu naman, ing keca marapat”

Dapot ustung ica, siglung ning alcaldi
atin cang agawang, icami ali mi
ibie ke ing manuc, para king cacagli
mung cabangal pusung, memita caniti

Minisip ya’y Simu, king dapat nang gawan
ban ining parusa, cayang acabiusan
ot cabira-bira, gulping mipatiman
king cayang aisip, king manuc a derang

Malale neng binuat, at pidurut-durut
a gewa ra naman, ding cayang carungut
at caibat sigpang ne, buldit itang manuc
saca ne pinyipsip a alang patugut

Alang mipabulad ; mipatingangas ya
ing alcaldi pati, ring magbante caya
neng alang mebisang gawa king depat na
binye re ing manuc; dinian de pang pera …..

carapatang banding pawaga 2013 neng:
Vhelle V. Garcia
March 10, 2013
United Arab Emirate

Posted in PL Vhelle Garcia, Poeta Laureadu | Leave a comment

Dalit na Ning Dila

Posted on April 25, 2022 by Almario C. de Jesus

neng Almario “amor” C. de Jesus –

Makayamang dudungdungan,
Amanung mengatalandang,
caring labi ning poetang
matas tutu a tagimpan.

Nung buri mong apilasa
ing yumu da at linamnam,
simen mulang tunggal tunggal
palub la king paldungngusan.

Amanung misna king lambing
anting dalit na ning Uran,
neng durugpa ya king gabun,
adayu ne panga galtung.

Bucud ketang metula ca
mipayid ca pamagmalun,
miragdag pa ing beluan mu
ketang Amanu tang Sisuan.

Anya sana O poeta
o kecang pakirandaman,
Madalas me sang pialungan
yang lira mung makasimpan.

At nung emu pa abalu
ngeni keca cu na sabian,
dacal ca ababie tula
kareng babasa’t darandam.

acdj

Posted in PL Almario C. de Jesus, Poeta Laureadu | Leave a comment

KING ARAPAN NANG PILATO – JUAN 19:1-16

Posted on April 19, 2022 by Orly M Dizon

binersu neng ORLY MANALO DIZON; Ortagrapiyang: C-K; Sucad: 8/8

1
Ding judyos ngarang cuculio / mibabuang lang migaligit
“I barabas atiu king crus / i Jesus ya ing ipalit”,
Macanian la casapsap mua / ban cang Jesus da apakit
Libutad Ya caring presu / ya’ng aduan reting masipit.

2
I Pilato pelaco Ne / at pepabatbat i Jesus
Malagua no man memintu / ding mamarusang sundalus,
Itang masucsuc tanaman / king corona de’i inalcus
Tsaca pinutung cang Jesus / buntuc’t canuan na metandus.

3
Pasibayu i Pilato / ding judyos keang linualan
At carela inulit na / Jesus ‘la yang casalanan,
Dapot detang pamuntuc da(pari) / cuculio dang miyagnan-agnan
A i “Jesus yang ipacu” / king ban crus Ya miyangganan.

4
Inia canita’i Pilato / ngana iting mengamanu
“Icayu na’ng bala Kea” / at cuanan Ye’ting dili yu,
Dapot cacung pamagsuri / ‘la Yang casalanan cacu”
Sinala na carin judyos / a i Jesus bulus Nia mu.

5
Ding judyos e la petugut / ing batas da ya’ng inapag
A i Jesus ing mate ya / uling Kea nang babansag,
Iya itang Anac Ning Dios /
a malino nang papasiag
Apibalac nang Pilato / at bisa ya’ting mangilag.

6
Pengutnan neng pasibayu / i Jesus nu macabalen?
Dapot Jesus e makibat / uling ‘la Yang geuang crimen,
Cang Jesus keang sinabi / ing gulu Na buring lauen
Iya cabud maca-utus / tucnangan De’t e na paten.

7
I Jesus nganang mekibat / “tutu pin ‘ting cang upayâ
A menibat ya’ti babo / gamitan king ustung gauâ,
Mas dacal la pakibatan / itang Cacu yang masapsâ (manganyaya)”
Caring pakibat nang Jesus / Pilato e megsalitâ.

8
Buri na Ne sang pabulus / i Jesus keang cabilian
Dapot tinercu la deti / cuculio ing capasiagan,
“Nung Jesus kecang ibulus / aring Ceasar nanung sabian?
Keca ya’ting beliuala / kecong pamicaluguran”.

9
I Pilato king dimdam na / caren gigcas dang amanu
Jesus pelual at lucluc king / piucuman entebladu,
Ngana careta nang judyos / “oini lauen ye’ng ari yu”
At carela binie Jesus / ban king crus ipacung ustu.

Posted in PL Orly M Dizon, Poeta Laureadu | Leave a comment

ADBOKASYANG E TUTU

Posted on April 19, 2022 by vhelle garcia

Ing adboskasya na kanu, paglualu ne’t simpanan
king pusu at kayang diwa, ing amanung Kapampangan
ing bage nang pagmairing, makananu kung panwalan
nung ding susulat na niti, a kayang pagparangalan
e no bandi ning balen a, salita ra retang daywan
a lalaso king pundasyun, ning kekatang sabing menan

Nung balid ya ing dila na , king kayang pamanialitã
king amanung sasabia’nang, lugura’na kabangkabâ
at nung ding meging suli nang, menibat king kayang dayâ
king sabi ta’ng katutubu, e la mebiasang bitasâ
at mas sinimpan do pa ring, salita ra ring banyagâ
ing pamana na ning lahi, kaya, e ke panibalâ

Uling ngana ning kasebian, bayu tamu manamuyut
kalinisan, muna ta pa, karing sarili tang bakud
nung king kayang mismung sular, e bitasa mang kinimut
ban lingapan ing amanu, ta nu naku ataklayud?
king pigampang sasabia’nang, maluat na nang dadagisut
a imbis king dagul ya sa, lakwas ya mung magugutut

Nung ding librung tingka na at, malalaguang pepalimbag
king amanung Kapampangan, e la ustu pangalikas
king baul ning kawatasan, da ring kudtang mangasampat
ala lang kawang ban karin, miyabe la at matangkap
uling den ding mangilasun, karing mayubung paniulat
ding salukuyang poeta at malapupuring watas

Nung ing kayang kapagnasan, king ba ya mung managumpe
king imbut nang mibulalag, tanggap kapurian at puge
at nung ding kudta ring watas, a sisinup na ‘t darake
gewa na la mung puhunan, king pamanintun pagkabie
ing makaniang klasing tau, e ya tutung makirame
ban itikdo ing kultura at amanung mipapase

Nung yan mang pangatau na, e ne balu pang bitasan
nung ninu ya karing adwang, ibat king mispak a kuayan
den pa mo kayang kataya, a nasa nang ipapakan
karing dimur da pang isip, ding kekatang kayanakan
samantalang ding amanu, a aplit nang kukulkulan
menibat la karing libru, ring banyagang kawatasan

Nung manusig ya king mali, da ring kayang disipulus
karing pamangamanu at panilulat dang bukut bukut
ing dangalan ding makudtang, king amanu mapanirug
mesalalua pasari na ning dapat nang e makatud
ing damla rang sadiasadia, miras na king mataluktuk
ditak ditak mayayagas, at king aun mababaldug

Pasiknangan ne’ing amanu, yan ing bata nang pangarâ
dapot metung ya king sangkan, inia lakuas yang miminâ
pablasang ding salita a, apse na ning kayang dilâ
e la purung Capampangan, miki-salat lang aliwâ
nung makanian, itang kayang adbokasyang paningayâ
e tutu at nasa namung tangalan de retang maldâ

Vhelle V. Garcia
July 5, 2020
San Simon, Pampanga

Posted in PL Vhelle Garcia, Poeta Laureadu | Leave a comment