Capampangan

Nung bisa ta’ng sumaup…
…e dapat maging maimut
Lubus-lubusan napin…
…at magalang ing kimut.

E ta manayang ablas…
…e ta dapat susumbat
Tune ta’ng pasalamat…
…keng agawang alang sukad.

E ta mu sisisian…
…itang darakeng yaman
Nanu mang bage param…
…e dapat bibilangan.

Ining dapat a mayap…
…king pusu milalablab
Utus king Dios menibat…
…gawan ta’ng marapat.

Dapat tamung tumula…
…saup kareng kapara
Magserbisyu’t lumugud…
…ilang tune panata.

~ Tulang ning Magalang ~
💚melanie26may2015🍀

Abe-abe Kapampangan, ini metung yang aguman
Nung nukarin akit mu ngan ing daliseng talamitan
Ing mumunang kapagnasan, misanmetung king parasan
Deng amanung mekalingwan kailangan ta lang gambulan.

Kening beluang adadake kekatamung manigaral
Katmung tula at kayapan uling atin ta’ng masabal
Kimut tamung mapayapa para ini dinan dangal
Ing rispetu at ing lugud, ini ibie ta’ng marangal.

Tayid-tayid, tipun-tipun, italakad, palabungan
Sesen ta ya at luguran ing Amanu tamung Sisuan
E ya dapat pikarine, iapse king pilubluban
Igulisak itang puge, kekata yang iparamdam.

Mekeni na KaABE mi, lungub na ka kening bale
Salilung ka at makiabe, makiramdam ‘giang keng lele
Amanu mu idake me at banglu na asangap me
Kalidad na iyang tune, ini e me apaglibe!

ABE-ABE KAPAMPANGAN…
TARA NANG MANGAPAMPANGAN!

🍀Tulang ning Magalang🍀
melanaie20sept2014vicenza
Melanie Cunanan
Melanie Cunanan Naguit

Ing lugud ku keka, balamu ing sapa, agus alang tuknang
Kikislap ya naman, anti yang diamante, sunlag itang kinang
Kalupa ning banua, e magbayu kule kening panimanman
At ing keang banglu, antimong sampaga, managkat yang bawan.

Ing lugud ku keka, alang pamagduda, lawe na ning musmus
Manipis yang cristal, nung kekang sulyapan, malino ya bubug
Atne king kayapan, kalupa ning usa, king keang pangimut
Libre yang gagalo, at nung damdaman me, magkanta yang ayup.

Ing kakung pacamal, anting berding bunduk, mipmu yang pagasa
Matulang magduyan, kalupa ning alun, e biasang painawa
Mengaring alino, pane makatuki nukarin man munta
Anti ya mong pulut, nung keka yang takman, mayumu ya lasa.

Anting pangisnawa, angin a malinis, ing keka lugud ku
Danum a malino, kabud ainum me, milako ka kau
Ing pali ning aldo, tatangab king pusu, sintang e magbayu
Lugud at pakamal, ‘yang babie sikanan king bie keti yatu.

~ Tulang ning Magalang ~
💚melanie27sept2013vicenza🍀
Melanie Cunanan
Melanie Cunanan Naguit