Capampangan

nang Apung Gusting

05/16/18

I

Lilípo ya keti labuad, akakit meng lakad-lakad,

keng piblas nang mengalupad, asalamin meng kínúsad.

Itang buak nang sayad-sáyad, mégutgut ne’t míbalíbad,

At legua’nang sakdal tingkad, míkapékas nang balangkad.

II

Gato-gátong anting bulung, ing ísip na luyung-lúyung,

king libútad ning dalúmdum at menúkup a dalúyung.

Manamuyut nang isuku keng tikal a sumpungsumpung,

ing tagimpa’nang lumábung a bibekut ‘gyang nú santung.

III

Ing damlá nang titingkupan, pemanggírak dé ring daywan,

dékurak  de’t písagságan, déning alang pakundangan.

Gélogo re at simwákan ing dalíse nang karinan,

sebugánan deng alkitran ing malíno paintungúlan.

IV

Deng ápu nang báyung sapní mengarî lang pákatibî,

king dalisdis ning palsimî, gilid na ning pinanárî.

Reng díla rang mégagutí, keng útutang salwaksabî,

mamâpse lang tagpí-tagpî, gúlut da ring ípang sungkî.

V

Ing sibul a malapílak king sálû na sulak-sulak,

lálangî né at buburak at sisingong anting pitak.

Manyibsíbang áyup pinak mámako nong tunggal dítak,

Limpad-limpad no ring áwak bábo na ning meté barak.

VI

Ing damla nang sakdal sálâ mamitamit ne pin matda,

Mipaburen ya pablasa tiraidul deng palamara;

At imperyu ning Menila kakalat ne ing upaya,

Âktanga’ne ing Alaya, a karinan ding timaua.

VII

Ing aklis nang Mariang Kulut, ya’ing kulisak ning baláyan.

Isakwil ya’t salangsangan ing paratang a kalaban.

Ing maniákup é pábustan magárî keting karinan.

Ibantug ya’t pakamalan ing amanu tamung sisuan!

VIII

Anya ikong talaturû agapan yung masalusû.

Kapkapan yé karing pusû, matindag yung pamanyuyû.

É ta’ mako pangalugmûk, pangabuyun e mabugtû,

nung pane nang mipanyunu, bagkus dápat mipáglualû.