Lorung Malabit
Silaba 12 Sesura 6/6
Taladtad 4 Estropa 8
*
Itang milabas ta, balu mu pa kayâ?
Kanaku ing sabla, balamu napun pâ.
King balang pinandit, bata na kung apâ,
anggiang pang king pusu, ing yatad na lugmâ.
**
E ku na buri sa’ng, aganaka ku pa,
ing tiki ning anging, king ngeni memun na.
Dapot king tudturan, neng benging marimla,
ing bakas ning napun, pilit magbalik ya.
***
Potang daramdaman, kula retang dalit,
a karing pusu ta, bina lang malapit.
Sasagiwa la ring, aldo nang milandit,
anggiang ing babie ra, pawa namung pait.
****
Nanu man daptan ku, e ku akalinguan,
ing masayang oras, a sukat nang lakuan.
Anggiang ala nakung, nasa pang balikdan
kusa mung tutuki, king kakung pagkeran.
*****
Maniagiwa kaku, itang pisulu ta,
ustung manakit kung, malagung sampaga.
E ku akalinguan, a iniang kanita,
sasabit ku la ren, king salu mu sinta.
******
Sasagese ing lua, neng a-iisip ku
a yaku ing sangkan, ning pamanggulut mu.
Nung e ku pesaul, king abluk ning tuksu,
mekad e mu daptan, ing lumaut kaku.
*******
Pagkalungkutan kung, ala kung tetagan,
at pepasilo ku, king aliwang leguan.
Kabang ika mu ing, kakung kaluguran,
peparaig ku pa, king awus ning laman.
********
Nuka ka kaya ngeni, kinayap ne kayâ?
ing pusung binangal, ku at peparayâ.
Ipanalangin kung, apatawad me sâ,
ing kapalsintan a, keka memirayâ.
Rodel E. Gozum
07 Marso 2019
Munoz, Lungsud Ning Quezon
XLVII
Sana
Lorung Malabit
Silaba 16 Sesura 8/8
Taladtad 4 Estropa 8
*
Ing palad a makarikil, alang pamun yang dinatang,
aniang king pamaglakad mu, kabud da ka asapungan.
Kabang pamulutan ta ing, mengabalag mung daralan,
mitulid la ring mata tang, e kinurap misan mu man.
**
Lipat ke pa ing menunu, aniang kaku tumiman ka,
e ku na ikuang migalo’t, ding bitis ku mengaina la.
Kinabug ya ing salu kung, anti mong panambulan da,
melangi ku akmulan at, melalam ku pangisnawa.
***
King milalung pangabigla, alang linual a amanu,
karing kabud na mepakang, at menimutlang labi ku.
Ikua mu nang mitalakad, at mekalaut kanaku,
e ku pa mu rin mikimut, anting milako animu.
****
Kaibat ning pilan pinandit, aniang ikua kung mipakde
mamirapal kung melikid, ban tagalan da kang lawe.
Ala na ka’t e ku balu, nung nukarin naka mine,
anti kung mabasang sisi, a sisyup minuli bale.
*****
Anggiang misan da ka ikit, asilu mu ne pin agad,
ing pusu ku a mebandal, pauli ning lugmang palad.
Bista man maluat ne iting, maratun at e bubulad,
malalaguang arakap meng, mengaring ayup a babad.
******
King pagkeran balisa ku, at daig ke pa ing muting,
pakisabian ing sarili, at kabud ku piling-piling,
E mamapa ing tudtud at, kabukas kung biling-biling,
uling neng ume kung magpiak, ikang akakit kung tambing.
*******
Sana kitnan da ka mu man, nung nanu ing kekang lagyû,
ban nung nuka manuknangan, pagdulapan ku’t abalû.
E sa mengari king ngening, durugdugan ke ing salû,
e ku talus nung nang daptan, ban akua ta pang mitagmû.
********
Ngeni ustung sisilim na, pupunta ku ketang dalan,
nung nukarin ding landas ta, mikurus lang e sasarian.
Mangadi ku karing dioses, karin king banuang katasan,
dapat la sanang milagru, ban mikit kata pang misan.
Rodel E. Gozum
01 Septiembre 2019
Munoz, Quezon City.
