Capampangan

Neng Herman Pablo

Kapilan daka asungkit, talang maslag at maningning
ngening ing kakung panyungkit maimpis yang anting tingting?
Lon me, mangabayuktut ya indat tyupan at ne ning angin
at malagwa nang miragsang mikakasat ketang uling.

Keta naman barandilyas na ning awang ning palasyu
Ika ing malutung rosas a belibaran dang lasu;
buri da kaman sugkitan kening pibuknul kung tambu
magkasakit ku pa mu rin, papakli ya at duruku.

Pigampa dakang ayaplus da ring kanakung taliri
ban mu sang mika-kasnawan kening pusung mebalani;
o’ nung misulapu ku sa, sulapo kung e mangimi
ayan da ka king jardin mu agyang dimut mung saguli.

Iyayampang ining gale,keka, malagung dalaga
kambe na ning kakung payul maging ma-ingat ka sana;
Dakal la ring baintaung bisang makabandi keka
uling tala ka at rosas king telatau rang mata.

Inya sana O’ dalaga e ka dagling payamuyut
karing makipulut dilang malambis mangilindayug
uling kabud mibagsak yang mebalbal bugbug a lusuk
ali mu ne asubli pa, makanyan ing kakung usuk.

Neng Herman Pablo

Dening aduang miyasawa / ilang atyu babo kama
Matula lang mipagkwentu / king panaun milabas da
Ing babaying mengutang ya/ kaku mikasala naka?
E naku mwa, matua tana /mangulta sabyan mu ngana

Sabi ning lalaki kaya / apin ing kekang kumari
Tambing ne pin mimua’t mibua / yana pin ngana ning lalaki
Kasasabi pamu kaku / kwentu ku keka mung sinabi
E naka mimimwa kaku / tutal ita’yng pekatawli

Sigi itamu ne ngana/ ing lalaki itamu ngana
Tutu ala nang aliwa/ ing yaku namu tagana
Balu mung kaluguran daka / balumu ika’kung sinta
Saugli ngana ning lalaki / ika naman kutnan kaya?

Atatandanan mupa anyang / ikang pepabagut ipan?
E uari ing lipit kata / ala kang kapanintunan
Dentistang linawe keka / maratna nakung lalawan
Ing dadala kung bibingka kinandut ya’t mekatakman

E naka mimimwa kaku / ika’yng liguran kung tutu
Iti ya pang mipasbaywan/ liksu pangalalaki mu
Atatandanan mu kanita / anyang mesakit ka pusu
itang menopera keka / bang asalba da kamu

Aru !!! ngana ning lalaki/ sana ya namu ing tauli
Ing babaying mipatiman/ at tsaka pa ayli ayli
Tanda mu anyang tagal ka/ aburyanan ding botanti
Minyambut kang kapitan / landslide ka’t dili dili

——-‘——————————‐——————
Panupaya yu pu makanini ya pu ing kwentu ning kapusungan ding aduang miyasawa…
Misan dening miyasawa atyu la babo kama uling matua nala ,apisabi da tang panaun milabas da…. akutang ning babayi king asawa na nung migtaksil ne kaya, sabi na …sabyan mu e na ku man mimwa uling matua tana ngana, O sigi ngana ning lalaki e ka lulungkut ne ? aliku pakibat ning babayi gang kwentu mu ngan … Sinabi ina kumari mu ngana, tambing neng mibua ing babayi , nano i kumaring Rose pa ing pemalit mu kaku ngana…
Balaku sang kwentu ko ngan e ka muwa ngana ning lalaki….
O sigi itamu ne ngana ning babayi tsa ne migcalma … o ita mu ne ngana ning babayi
..awa iya mu ngana ning lalaki kaybat ala na ngana, meging tapat naku keka ngana…. O saugli mu pota galang ika man ngana ning lalaki?
Wa , e ca muwa ngana ning babayi ….gewa cu naman ita uling caluguran daka ngana. Atandanan mu anyang pebagut mo deng ipan mu uling ala katang pera kanita ,mekisabi ku katawan ku namu ing pamayad ku , Aru ! ika man pala ne, o ita namo? Kutang ning lalaki, atin pa ngana ning babayi uling kaluguran daka ngana , atandanan mung anyang mesakit ka pusu ? Kaybat ning operasyun mu ala katang pera kanita . Itang doctor liningun keka .katawan ku yang pemayad ku…O ala na kanyan ngana ning lalaki…,
Atin metung namu ngana.
Atandanan mu anyang minyambut ka keng eleksyun ngana deta ngan migbotu keka ngana…,,
Kabud menabu ya ing lalaki keng kama….. Yari ne pu.

Neng Herman Pablo

Ing naturalesa napun at nacadua
Cayacbe ning dulum ampo ning masala
Sipuac lusuc quing gamat ning maiupaia
Taung lelangan quelub na’t pepabala.

Lingcas a sinibut quing pinac, taldawa
Quinapmung aluntian at pepa sagana
Ding danuman, laug, danau, dagat, sapa
Mamagus quing lugud lamac na’t biyaya

Dening bunduc quing matas na pang pigampa
Inacse ning tau binie municala
Ninung milingus quing linang nang maula?
Nu nala!… tiburan a queia mamingiua?

Ing tau meging sutil quing Dios, milalang.
Ing naturalesa e na acambilan.
Pemutut dening pun alang caingatan.
Ilug, laug, danau dagat a pirquiryan.

Sigi ding taguling dimut dang pamangan
Pidaqueng gabun na dapot a pitamnan
Linibe a gedung, paniulung dang ausan
Ing naturalesa mescup nang cabilian

Nu”la ding masalpitic, magparaluman
Melumpaui queng balang aldo dumalan
Ninung nang milingap mesirang carinan?
Ninung miui…. quing mabubugtu nang leguan.

O naturalesa ninu ing magbante?
Cabiliang Salunan, quecang pangarate
Sesen naca’t lingapan iang manalale.
Aldo’t bengi magpaulaga’t lumaue.

Atin pang macudta lawiwi’t migale?
O artistang abalic sadya mung cule
At talaturu king ulaga mu mapse?
O saserdote quing pulpitu iugne?

Ninu nang maglualu queca ing magbante?
Pangasibul mu ninu nang manantabe?
Keng sadya mung lusuk linang a dalise
Atin pa caiang sundalus… midaun bie?

Naturalesa! burian mung cacu mutus!
Dadaun kung cudta a queca milingus.
Susunis rima quing Dios queia mamaus.
Cabilian mung…., uling iang cabud manatbus!

Ikong talasuyu ning amanung irug
Dalitanan taya karing bayung kutug
Sinta tang amanu king sidduan ilukluk
king kabling ding lirang bagting e apatlud

Munie kagalangan kambe ring pamuntuk
Dening lira tamung mangatni kalatug
abayan lang flautas, tompiang at cimbalus
ban keta king sigla terak tang malaus.

Ikong talausuc tayran yo king dalan
Dening bayung suling kailangan pang tairan;
Magalang amanu karin la turuanan
ban makatalingting mayap at katutuan

Bang keta tuntun lang matulid a dalan
Dalan ning kayapan, dalan ning kaustuan
Ing pamanalastas maging maleparan
king ban Ing amanu matas deng galangan

E tamu tutuknang susuyu’t magobra
Ing amanu tamu king ikasulung na
Kekong talasuyu anting pasaup ya
Masapsap lingunan ing kabilianan na

oren ding kasalang king mismung labuad na
Karelang kamandag matning kakalat da
Nung e tamu galo at ipaglualu ya
kalaban nang dila makapanyilab ya.

Tara na , mekeni na abe’

Neng Herman Pablo
Auguat 29, 2022

Neng Herman Pablo

Ing talang makaslag, king munag ya limbug
Mewala ing kislap, uari ing tinabug
Aslag na ning aldo, ikwa nang sinakub
Menabtak ing gabun, melangi ding ilug

Ikwang memaniplad, susulapo ayup
Tulang, mariposa mebating la kabud
Maleparang labuad sinigpo ing leguan
Ding maulang marangle, milako la timan

E nala bibiung pa, ilug at dayatan
Iyarle keng pusu, e ne kakatdug man
Uangis king kabalan, ala neng panamdam
Milako ing lusuk, mengapawi na ngan.

Miras ing panaun, ala nang susulat
Alang midadake, metung mang taladtad
Diua rang metudtud, balamu melanat
Pakatugtug meman, mengalto ne uyat

Anti yang tanaman, bulung mengalaglag
Silapo ning angin , karin king alapap
Mekeni na kayu munyat na’t mipakde
Durut na ning yatu, kaniti ta sabe

Dening pluma tamu tasan talang pane
Ibuklat ding asbuk, tara nang gumale?
Tara nang sumulat itang abe abe
Melungkut a yatu itang mamye kule.

Neng Herman Pablo

Potang marap naku kening nang salamin
aganaca tambing napun kung kinilim
kaplas king pusu ku malwat nang milimlim
ing kaugtuan aldo yang meging sisilim

Panaung dinalan king pamangulila
tik tak ning oras bills king durut na
mamasa ing pusu pengakung simpan ta
pamikit pasbayu datang na pin sana

Yacung pane atyu lugal tang tipanan
mumunang uma mu karin sasagiwan
kaku meging mula sayang alang anggan
at meging ligaya ku jardin kung tuknangan

Tula nining pusu yang meging karinan
nung nu ya teterak kabang gaganacan

Kwentung kapusungan
Neng Herman Pablo

Kwentu ding mitau, minuli king baryu
bale ning babayi gagawan deng saktu
lalaking megsipag ,bisa yang sumuyu
pantalun susulud, pelukas neng apu

Dinuang kursisilyu ,isulud mu ngana
ing kursisilyu na tambing na neng kinwa
sikbit ing martilyu sinampa king biga
Ing kursisilyu na yang lolongga longga

Ing Apung mebigla, mata nang mengasdan
apu ninaku ka ? dalagang mengutang
nuko!!! ali ngana!!! pakibat masikan
atin adwang ebun makabang latondan
e migaganaka kaku nong atakman

i apu yang mimwa nananu ka kanyan?
atin naman akit gang king tindangan
atin senyorita , pugu atin naman
atin mangalati , masustansya noman
Apo!!! deta sadya ku nalang sasalwan!!!