Neng Herman Pablo

Panabilin kaku ning mal kung tatang
Akilalang tambing mal a Kaluguran
Ikang mangitawu dakal a pamangan
Babo na ning papag dakal apulutan

Mangiyanda kang mic at dakal a alak
Balang ngan masaya misapak ing papag
At makitalamitam kwentu dang iyapag
Kanita ing tula miras pa king munag

Miras ing manampil mengalasing nala
E muno agyagan kaba pa ing piesta
E muno tuturu nukarin la munta
Balu ra payuli muli king karela

Karin abitasa ikang lawe lawe
Ninu ing mitagan at keka lumele
Sumaup manampil ing maglele lele
Bayu naka lakwan akwang mesalese

Keng katataulian sabi napang tatang
Pilan la king yatu tune kaluguran
Keyang panabilin tiru’t kausukan
Makanyan ku pala kakung amalayan

Yarle keng panaral babo ning pulpitu
Mensaying patuyag na ning Ebangelyu
Tune kaluguran Guinung Jesu-Kristo
E maglakwan king kasasagkulan tamu

Sonetu
Neng Herman Pablo

Cacung mal a cuadrung pinacu quing dalig
Macatalilis ia ampong macacubit
Metulang babatio caiang pangasabit
Aburi ding dacal gang ne catagilid
Quening cacung cuadru atin sasalicut
Malati iang dagis ing maquiquisaut
Macma cung lumapit tiplad ia’t lumaut
Potang ala nacu carin durut durut
Misan aisip cu dinan keng apangan
Milacuan cung mais lalam na ning dulang
Isalba cung cuadru quening caiang leguan
Megisi ning cuadru cacu lang ulipan
‘Nanung lugud aibie malyaring iampang
Nung quening manyira e agiung luguran’

Uling pane dang papatdan ing sulu ngeni , makatakut lulwal dalan pota apaindalan mu deng manabit o kularyut ,magkwentu tamu….
Anyang minunang panaun atin lang pitatakutan

Atin pun na ning baliti
atyu butarul baltangan
Makamaputi a susulud
pisak ning benging malalam
Masalusung lang pupulayi ding tsinelas dang tatalnan
Makapiyak a mata ra ninu man keni dumalan

Makatiwangwang a gabun malapad lapad a sular
Makamaputing babayi patye bengi keni lulwal
Dening manwala’t tatakut lalu nalang miparakal
Potang atin nang dumalan mangatug la tud gagalgal
Pangaras ning pangayabak ini yang dang pitataltal

Kulyat- Sampernandu ding thames gagamitan pamasada
Dening Driver at konduktor ilang pane lmisasangga
Ing Piesta nang Apu karelang piadya
Madalumdum a dalanan king oras ning alawuna
Mangalampag basyung biayi
pang kape da man ala pa

Atin memarang babayi tiknangan de at seke
Maka maputi imalan makaba kaba ya takde
Ing matingkad nang susulud ing manguleng mala nebe
Mikatakut a kondoktor e akwang milawe lawe
Gagalgal ampong magnerbiyus mibalut kaya minakbe

Batyon batyon neng malati king salamin ne lalawan
Siknangan kabud ing lub na at tsaka manene neng kitnan
Obat kitang ing susulud
imbis ing kayang kuldasan
Simbitla kening babayi obat maputi kayu imalan?
Mimwang babayi, mekibat
keng TIDE pinipi ke pa yan!!!

kapusungan kwentu
Neng Herman Pablo

Ing malasing ampong kargadung droga ( shabu)….
Atin malasing ampong kargadu ya pang droga keng kalasingan keng alak ampong droga aisip nang ilage ne itang makasalikut nang granada… Tambing linub king utak na ing kamwa ampong gumanti kareng kamwan na, kening isip nang atsanan nalang granada , obat mikatagum mipandalan ketang bale ning pulis malapit ketang tuknangan da, na misan dinakap kaya keng pamangulu na keng lugal da, ing pulis yang apagdiskitan na . Lumwal ka keni magmamatapang pulis patola! Masikan nang gulisak alus dimdam da ngan deng keng malapit a siping dang bale , iyagkat neng tumbukan ing pulis, gewa ning pulis , sinabi na namung muli naka, bang e da naka bitbitan pasbayu at idala munisipyu, uling e bisang lumwal ing pulis linwal neng tambing ing granada na at tsaka pasbayung ginulisak masikan, ‘ nung e ka lumwal ngeni murin iyatsa ke ing granada keng bale yu mamilang kung pitu tsa ne tatalnan ing granada makatas la reng gamat na, mamilang naku nganang mamatakut , wan…tu (sabe buklat kareng taliri na senyas ning kayang pamamilang ) tri … por ( pepakit na tinggal ne ing pin ning granada) payb ( meyari nala deng limang taliri nang sesenyas anya sinipit ne pa ing granada kareng puad na bayang makapamilang pasbayu keng metung napang gamat , deretsu na pamamilang ) siks , seven!!! Baaaaaaang!!!
Ing muting akalingwan neng makasipit ing granada kareng puad na…

Liksyun…
Pota pin malasing ampong makadroga e mu balu ikang makamate keng sarili mu…
Yari ne pu..

-Herman Pablo