Ing Pamilyang Kapampangan

Posted on August 15, 2022 by Herman Pablo
May be an image of tree, sky and text


Ding e patugut magobra kalupa nang koyang Mandu,
Roel a balisang pulis magobra king Munisipyu
maranun makagising ne
i Mariang magtindang putu
kabilang de ding magtindang
tambing nang atyu keng puestu,
Ding magobra king eskuela
a mangalati mu sweldu
itang mepilit mig- abroad menulakan a kong Dariu
i Roman ken ne man sabung kukulyo mag-kristu-kristu
alang patugut a kakayud Robert keng jeep magmaneu.

Manalbe ka king balita dakal pang mangapalyari
abalitan me i koya inabusu ne i wali
dening magaral nang anak ken lang bisyu mengawili
Ing bunsu nang pakamalan yang idad na pang katorsi
kareng asbuk ding aliwa dimdam na, atin sinabi
Ikit ke napun anak mu
yang mabuktut ne pala iti
Iting sakit ning balayan karing balisang pengari
ning pamilyang kapampangan king keyang pangaduajagi.

Mengalinguan a pamilya king ugaling pimamanan
nukarin la ding pamilyang
neng sisilim mikakitt ngan
Ing piyadian dang orasyun
neng apunan bayu mangan
kaybat mengan ding miyanak akit mong mipagkwentuwan
ding anak biasa lang siklod bayu munta king ulunan
ding pamilyang mangasaya bukas da e gaganakan
bie payapa ing kanita obat ngeni milibayan
king bie dakal a ligalig ngeni ampon king daratang.

Ing pamilyang kapampangan mibili quing ‘under attack’
keng mayap a kaugalian mewala yang ditak ditak
mamaligwa tang minono
kapanintunan midagdag
mapagal tamu katawan
mebating ing pamanlingap
pabaya kening pamilya
lula kening magaganap
Ing pamilyang kapampangan
lilisya king map a daclat
dakal no ding miyasawa king sumpa ra e na tapat
mamiligrung nang miragsa ing marangal a sosyedad

Mipnung aklis kung kinudta
ala kung nasang paturan
mamalita kung siwala king magaganap king tibuan
Nang agawa ning memalen magkulangan nang kabiyayan
karening pengarring meko
tinalas king kasakitan
atin man a menagumpe
a manabu king kabiguan
nukarin! Nu ne miparas ing maningning a tagimpan
nukarin ne ing dangal na ning pamilyang kapampangan?
Nung lasak ne ing pamilya , ing bangsa lasak nia naman…

‘ing Pamilyang kapampangan’
Neng Herman Pablo
August 13, 2022

Posted in Poeta Herman Pablo | Leave a comment

TUNE KULUL

Posted on August 15, 2022 by Irvin Harvey Rivera

Makuyad a Poesya
Irvin Harvey E. Rivera
Siuala Ning Maliwalu/Anac Ning Baculud
September 17, 2019

Ing D’yos ‘nyang lelang ne ing kayang kawangis
Pekaulma ne at pekagulisgulis
Dinen neng kabyasnang wagas at malinis
At ing pakamal na tantung labislabis.

Nanu mang kabyasnan—-atin ya ing tau,
Yan pigkalam na ning malelangang Guinu
Pigkalam nang tagle, bukud a talentu,
Dapat yang gamitan king mayap at ustu.

Upaya’t gelingan nung pituliran me
Ala yang keliwan karing bagebage
Mayalang-ulaga nung ding mesaglawe,
King pamanabusu karin la mirake.

Istung ing bageng yan e mu peulagan,
Ginamit mu yan king alang kabaldugan
Nung yang upayang yan nasa mung dalpakan,
Bie at pangatawu, E makatuliran!

Nanu mang bage ing pigkalam da keka
Sukat ya mung dinan pamagpaulaga
Salapi’t pibandyan, yan ngan amamana,
Dapot ing respetu—yan pupupulan ya.

Tinanam kang mayap, mayap kang mamupul
Lugud at respetu—-maulagang simbul
E ya mayayakit king lati at dagul,
Mayap mung depatan, magbabo ing kulul.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

BAN MISAN PANG DATANG

Posted on August 15, 2022 by Orly M Dizon

Neng ORLY MANALO DIZON;
Orthografiang: C-K; Sucad: 12;

1
Maibug ne tagana / iting mamitamit
Lubus macalinguan / at e na magamit,
Uling iti kea / rugu mipagcait
Itang dapat lingap / kea mangaintulid.

2
King keang cabilian / ya na ing ginagad
Migcusang abalu / gulis keang palad,
Ampo ning angganan / kea macasucad
Ban mirenan lunas / ing kea mitacad.

3
King agus ning danum / no deti tinubud
Detang keang lira / king alun pepanyud,
Mengapilpil la king / pampang mibulabud
A manayang caul / at mapaling lucub.

4
King angin na noman / deti pepasitsit
Ban miras la deting / saguling penandit,
Caring magmasabal / at magmalasakit
Ban ding salita na / ba dong pangulait.

5
Inia naman sana / bilang Capampangan
Ing Salitang Mana / e paglibe daiuan,
Nu ca man misanglad / nanu man balayan
King dila igagcas / ing Amanung Sisuan.

6
Caring talaturu / na niting Amanu
A gagauan da ding / miayaliuang grupu,
Ing pamanigaral / dalasan ding ucdu
Na ning talamitan / ban linang yang ustu.

7
Detang matenacan / corderung poeta
Agcatan da cayung / ‘gulis kecong pluma,
Pane mamicudtang / malagung poesia
A maguing kecayung / king bie maguing marca.

8
Ing pami-ugnayan / ning metung mu bosis
Yang puntong maula / at gauang macunlis,
Da ding sablang grupu / ing mibigkis-bigkis
BAN MISAN PANG DATANG / ticas na’t kilatis.

Repost: DIZLAG FARM, August 11, 2022

Posted in PL Orly M Dizon, Poeta Laureadu | Leave a comment

Mangapampangan ka!

Posted on August 10, 2022 by vhelle garcia

Yampang ke para king aldo ning Amanung Sisuan

Nung mibait ka king labuad , ning mal tamung lalawigan
At kukuri king uyat mu, ining dayang Kapampangan
Nung ding taung kasabi mu, metung kayu penibatan
Tandanan mu sana abe, dapat kang mangapampangan

Dapat kang mangapampangan, uling ding kekang pengari
Mamaltuk lang kapampangan, at ding pipumpunan deti
Dapat kang mangapampangan, uling yan ing manang sabi
A sukat mung pagmairing, neng itamung miki-bandi

Dapat kang mangapampangan, ban maramdam keti yatu
Ing sunis nang sari leguan, ning mahalan tang amanu
Dapat kang mangapampangan, uling apin yan ing ustu
Pablasang e ka tagalug, bisaya at ilukanu

Dapat kang mangapampangan, uling iniang isaldak ne
Ning Guinu ing babylonia, yan ing amanu nang binie
Dapat kang mangapampangan, lakuas nung pakisabian me
Ban king kekang kayaduanan, mulingid yang masalese

Dapat kang mangapampangan, uling e mo ikarangal
Ding amanu ring banyagang, king dila mu makapugal
Dapat kang mangapampangan, palto mu’ing kekang masabal
King salitang bandi tamu, a sukat mung pakamalan

Dapat kang mangapampangan, uling ing pangatau mu
Makikillala ya e mu bilang metu pilipinu
Nun e bilang Kapampangang, mitagurian dayang asu
Pasari na ning kultura,, at ning kekata’ng amanu

Dapat kang mangapampangan, ban ing amanung dalise
Lumabung ya’t maniampaga, ampon maniagiwa aske
Dapat kang mangapampangan, king ban sikan at tumibe
Ing pundasyu’ning amanung, maybug-aybug nang mipase

Ing ningning na ning amanu, king ban e tibubus matdâ
Lingapan ya’t pasiknangan, ing kundap- kundap nang salâ
Pablasang nung e ne sunlag, e ta ne akit bitasâ
Laklakan ne nitang dulum, at kanita ne mawalâ

Vhelle V. Garcia
August 10, 2022
UAE

Posted in PL Vhelle Garcia, Poeta Laureadu | Leave a comment

Queng palsintan cu

Posted on August 10, 2022 by Herman Pablo
May be an image of 1 person, body of water and text


Cabang paratang ing aldo pabanuang capagmasusian
Aquit mong macapadurut ding bulaclac ning aguman
malaut cu man, dindam cu bosis dang asna casican
sabit ding banderitas ding carelang pisasabian;
queta quing pun na ning pinu migpaynaua cung migsandal
quing capunggul nang bulung aldo maslag iang mitacpan
painaua ing gulut cu, painaua que ing isipan
inyang biglang aisip cu iang aldo nang camataian

Ining aldo ia ing aldo quing sinta cu mecamate
matudtud ding caluguran a dapot sanang magbante;
ban calibudtan ning pisac piiadian do ring salaque
quing palijim dang panlusub, quimut dang cala calale
palsintan cung mipda isip, ala iang camale male
uling dening lilung sucab quing calising da pin pete
dela queta quing pampang careng sapua layun seque
cabang quing cangatbang ilug lulucsu la quing tagumpe.

E cu balu ing gauan cu quing miras nang capalaran
macananung mibalic ia ing cacung mete palsintan
nung atiu cu quetang aldo pete ra ne mung macanian
paglualu queng anggang binit agyang icamate cu man;
angga na quing tauling patac na ning daia, ibie cu ngan
ing bie na libaian queng bie quing maplas cung camataian
macatalanga cu babo maniad cung capatauaran
Cambe na ning pamanisi quing canacung pamagculang.

Palsintan cu, cabaluan mung a queca cu pa manaia
pasibaiu cang subling mie, pasibaiung miquit cata;
alang patugut tatais que ing pluma cung sasadia
bang datang man itang oras quening bale datang naca
ninu pa man sinta cu alang macalapit pa queca
uling tang aldo pamagdatang pacabanten da naca
sinta cu e na mitali e na mate pasbaiu pa
uling ing cacung lugud cabang caba biaian naca.

‘Queng palsintan cu
Aldo ning camataian
Disinuebi ning Agostu’
Neng Herman Pablo
Agostu 08 2022

Posted in Poeta Herman Pablo | Leave a comment

Anting Sinulapo Burarul

Posted on August 10, 2022 by Jose Roman Reyes Laquian

May be an image of outdoors
   ( Like A kite That Flew ) 
             ( Tula / Poema )
                          nang   Jose Roman Reyes Laquian  PLI 

                     Qng panaun ning bie
                          cacu nang denasan
                              tinas co qng gabun
                                  sese cayanacan
                                      cayantabe da cu
                                          qng pamagpulaian
                                               anggang mepagal cu
                                                   mimingal catawan .
                     Micacalabugan  
                          qng calicutan da 
                              babo ning bubungan
                                  mangaparas la pa 
                                      lulupa cung mactung 
                                          tatagal carela   
                                               agad cong papatsean            
                                                   ding balang sugat da . . .
                     Din'tang ing panaun
                          ning pamagsulapo   
                              metung bolang pisi 
                                  cacu yang pepalto
                                      dapot qng talan cu
                                          a mibalicucu  
                                               qng iquiran pisi
                                                   rugu meguili cu . . .
                     Anting sinulapo
                          burarul qng banua
                              ding bala cung anac 
                                  mamagsulapo la
                                      caras na ning tacdang 
                                          panaun mamun la
                                               pututan de'ing linia
                                                   yacu ing lacuan da .
                     Mamagsulapo la 
                          qng bie dang pa'intunan 
                              timauang manintun
                                  carelang cabyayan 
                                      at uli na niti
                                           lungub qng caisipan 
                                               agampanan cu na'ing
                                                   cacung catungculan .
Posted in PL Jose Roman Reyes Laquian, Poeta Laureadu | Leave a comment

🍀 Mayubung Kausukan ☘️

Posted on August 9, 2022 by Melanie Cunanan Naguit

Ing taung alang kapanupayan,
ditak a bage agyu nang silaban.
Dapot ing mapanupaya nanu mang bage bubua agyu nang apatda.

🍃 melanie4agosto2022 🍃

May be an image of fire and text
Posted in Poetisa Melanie Cunanan Naguit | Leave a comment

💚 sitsit ning pusu 💚

Posted on August 8, 2022 by Melanie Cunanan Naguit

Ining kakung pilubluban kakabug ya neng isipan
Ing lugud mu’t katapatan kaku la ngan pakamalan
Silipan me ing pusu ku ika mu’yng makalarawan
Kinupas man kekang leguan ulaga mu e kalingwan.

💗 pusung makatiman 💗
🍀melanie9marso2019🍀

May be an image of African daisy, outdoors and text
Posted in Poetisa Melanie Cunanan Naguit | Leave a comment

Budning Watas Ning Amanu

Posted on August 5, 2022 by Jose Roman Reyes Laquian

( Poema Para Cang Painturung Poeta
Laureado ( PPL ) Tony Mallari Medina )
nang Jose Roman Reyes Laquian PLI
8:30 PM Lunes 31 Julio 2017

Babo na nitang alapap , / matas maiguit caring biga , /
Lagpus queang atmosfera / ya’ing tronu qng catlung banua /
A magsilbing lucluca’Na / ning POETA ding Poeta , /
Nung nu macapatulug la / ding Poeta ‘niang Minuna ! /
Magpuri la ding Poeta / Queang POETANG MACAMAL , /
Pas’uala la ding trompeta / qng Tabernaculong Banal ; /
Magui man ding alpa’t lira , / ding papuri da papalual /
Cambe ding Pasasalamat / qng Bayung Datang a Caual . . . /

Uling maragling inaus / ne ning sumangid a yatu /
Iyang Budni at Uwaran / Anac ning Indung Amanu ; /
” ‘me ca queni , ” ngana quea , / ” Budning Poeta Liricu ,”
” ‘mequeni ca’t mangudta ca / qng Amanung Masna Yumu .” /

Que libutad ning Consejo / da ring Daraquilang Watas , /
Budning Watas Capampangan / ning Panaun a Milabas , /
Maqui timan caring labi , / tinalacad yang maticas /
Ing Poetang bayung datang , / midinan Mayap a Oras . . . /

Tony Mallari Medina , / Budning Watas Ning Amanu , /
Bista man ing catawan mung / gabun metudtud queng yatu , /
Dapot ing Taganang Ica , / atiu qng arap ning GUINU , /
Abe ding Matuang Poeta / mamacudta’t mamagbersu . /

Madegulan Pupugayan / at Pasalamatan daca !
Pauli mu , mipacde la / ding Bayung Suling Poeta /
Caring Guintung Cawatasan / malugud mung pepamana , /
Ding Cayapan papasiag ra , / qng Catuliran tuquian da ! /

Calupa mu , mangilabas / la ding Watas Capampangan /
Queti sulip , at ing Lungan / da ing Labuad Qng Catasan ; /
Cuana’Ne man queti yatu / ing Caual Nang Madangalan , /
Dacal pang Caual Nang Watas / ding itas Na ning Miglalang ! /

Posted in PL Jose Roman Reyes Laquian, Poeta Laureadu | Leave a comment

🍀 Mayubung Kausukan 🍀

Posted on August 5, 2022 by Melanie Cunanan Naguit

E mu papalyariang mipanpanan ing leguan mu keng marawak a arapan mu.

May be an image of flower and text

🍃 melanie31july2022 🍃

Posted in Poetisa Melanie Cunanan Naguit | Leave a comment